中信泰富（267）4年前因為「炒燶」外匯期貨，埋單虧損147億，全城嘩然。盈警發出翌日，股價急瀉6成，最終還得驚動母公司出資相助，方能解困。而領導班子亦得請辭謝罪，以釋（股）民憤，其實能夠避過牢獄之災，已屬萬幸。其中一位高層上星期就此事件涉及的2項內幕交易控罪成立，被判入獄15個月、罰款1百萬元，以及3年內不得擔任香港公司董事。
經濟犯法 求情藉口幼稚
涉案被告早已轉職另一內房上市公司，上月底罪成待判亦已請辭，現成雙失（失業、失自由），家庭面臨驟變，自不好過。不過有句不近人情的話，卻是此刻寫照：「早知如此，又何必當初。」當日身為財務部二把手，知悉公司輸大錢後，完全清楚這些資料極為機密，且是市場未有掌握。不待公告就分批沽售手持公司股票，從而避免損失，徹頭徹尾就是內幕交易。
而辯方律師求情時稱，被告5歲喪父，12歲已要工作，但他努力奮發，半工讀完成大學及碩士，並考獲特許財務分析師資格。成就得來不易，且是家中經濟支柱，惟被定罪後，妻子要搵返嘢做，而幼女亦留學夢碎。案發時被告月薪7萬，但因每月開支龐大，又擔心股票大幅虧蝕，無法維持家庭生活才會犯案，是出於愛護家人而非貪念。我不是說風涼話，但月入7萬，縱非高薪厚職，亦足以維持小康生活。既然愛護家人，自要小心翼翼，免得行差踏錯，悔過難返。艱苦成就，更要愛惜羽毛，否則前功盡棄。
基層經濟犯法是為勢所迫；中產經濟犯法是保護家眷；富人經濟犯法也不過就是一時疏忽，因為申辯理據咪係：我已經咁有錢，又點會仲貪圖利益呢？又或唔搵多啲，又點夠我揮霍。說來說去，如果我們信奉法治，每個「被判刑」者都有罪有應得的理由，雖然每個亦可會有一感動自己的故事。
如果對於這次裁判，真有甚麼深感遺憾之處，我想就是年初另外的一單內幕交易案。前民航處處長林光宇，退休後擔任港機工程非執董一職，知悉公司將會有併購案而旋即偷步買入公司股票。而其答辯就係案發當日晏晝（即係日光白白）飲多咗酒，先會影響判斷，甚至唔記得咗自己嘅董事身份，不過轉頭就記番起要去開董事會。講得出呢啲咁低庄幼稚嘅借口，當今世上，亦惟有CY可與之匹敵。惜最終竟獲輕判監禁5個月，緩刑2年，夫復何言。
