馬恩國，記住呢個名，尤其係阿爺，膽敢在立法會公然侮辱中國特區民意代表為Bloody Chinese、Fucking
Chinese，呢類挾洋自重假洋鬼子，民建聯也要清理門戶。佢用Bloody Chinese一詞， 即係代表呢條茂利係以洋人自居，當今強國盛世，民建聯容許種族主義者在議會公然汚篾中國人，可見佢哋愛國之心，全屬謊言。睇來澳洲領事也要關心關心。
最近建制派群眾頻頻用出位言論、行為來對付長毛，每次最終都自曝其醜，挑機長毛失敗。正因為左派群眾水平低，以為長毛不學無術，只係獨孤一味靠粗言上位，只要鬥粗鬥大聲，就可以氣勢上壓倒長毛。
其實長毛又豈止粗言咁簡單，佢文化修養與曾鈺成不相上下，有勇有謀，議會出位行為只係策略。而老左盲毛則有勇無謀，基本上同香港主流社會脫晒節。今時今日澳洲大律師已經冇賣點，識講英文已經冇賣點，真係Out到爆。但呢位馬發言人之所以仍認為自己Somebody， 正因佢老哥處身在民建聯之中，操流利英文及具大學學位、專業資格少之又少，令馬自覺高人一等，並將呢種囂張傲慢態度帶入立法會之中。
話說2003年七一之後，民建聯上京受曾慶紅訓示，贈予八字真言，叫「外樹形象、內強質素」，回港後便重點裁培一批海外回歸專業人士，表表者乃蘇錦樑，一位在加拿大執業的律師，突擊入黨坐白金升降機出任副主席，擴大問責制後變身副局長，是第一批入政府之黨員，當時佢起初唔肯放棄加拿大護照一事，令全個政府為此付出沉重政治代價。今屆佢又再成為工商局長。可想而知，呢類海歸港人在左派陣營已成為天子驕子，而北京也誤以為靠佢地流利英文，專業身份，便可將民建聯推向主流，令中產主流接受民建聯。
人算不如天算，呢班左派新貴，能力及品格均低下，馬兄所暴露之咀面比土炮左派更不堪。一句Bloody Chinese，將03年來民建聯努力經營中產形象，一舖清枱。
