 |
| 中聯辦主任張曉明上任後，拜會梁振英。（資料圖片） |
張曉明撐CY，話巿民對特首評價比傳媒所見好，呢個觀點梁粉都多番表達過，可能港澳辦做過調硏才有此結論。民情與輿情有落差係事實，但並非各走極端，而是民情差、輿情更差，這才是真實狀況。
傳統建制派歷次選舉有四成半左右支持者，其構成應是所謂一高二低群眾，即年齡偏高、低收入、低學歷基層巿民。呢班群眾當然看重民生議題，對價值信念不太重視，邊個執政也好，有嘢派就ok。工聯、民建聯、加上何喜華、施麗珊代表呢種民生福利派。由於欠政治信念，呢班人對梁振英持較正面態度。反觀對梁振英反感，是年青、中產及有價值信念者，重視誠信、操守、民主自由法治等核心價值，學歷水平亦較高。傳媒輿論以中產主流觀點為依歸，所以對梁振英持負面態度。正如明報去年大力挺梁，幫手造王，但當選後也不能對他僭建及誠信危機視若無睹，為了穩住中產讀者，也要加入插CY之列。民情與輿情之落差也由此而來。
但自施政報告發表後，民情輿情落差也開始收窄，基層支持者認為佢開空頭支票，冇實質嘢落袋，加上房屋政策吹大之後交唔到貨，基層支持者也開始動搖。最近中大及港大民調均顯示梁振英民望創新低，全因施政報告失敗所致。
張曉明提到大家多參與，少旁觀批評，亦與梁自我孤立有機，因他將親疏有別執行到底，派位比一班無政治活動能力之梁粉，其他建制中人看在眼裡，自然閃得就閃，唔出聲就當幫忙，邊有人敢為佢保駕護航。加上梁之政治判斷力差，以為出律師信告信報，就可以令傳媒批評者收聲，結果變成與全港知識分子及評論員為敵。一個正正常常的建制派，會認為梁振英及核心幕僚乃一班不正常人士，邊個仲會為政府決策站台。正因為痲瘋效應，人人敬而遠之，結果令原本已冇乜朋友之政府日形孤立。
造成這局面，可以怪邊個，只能怪選舉時將唐唐玩得太盡，選後心胸太窄，愈玩愈縮入小圈子。張曉明如果真係掌握情況，第一個要訓斥，唔係反梁媒體，而係梁振英本人！
