施政報告能否挽救特首民望？好難。
官場中人睇過第一個初稿，認為假大空，只將選舉政綱改寫而成。其實一份好嘅施政報告，有假大空部份係冇所謂，虛與實兼備，相互呼應。好多人睇唔起務虛的論述，曾蔭權係典型，佢謔稱為「佛偈」。但務虛不等如吹水無料到，因為務虛並不等如廢嗡Bullshit。
可惜本地低水平政客口中務虛變成一堆陳腔濫調套話廢話，尤如老董「祖國好、香港好、香港好、祖國好」。本來香港有幾個公共資源分配基本概念，有必要在理念層面作討論。例如梁振英掛口邊嘅「適度有為」，到依家都只不過係口號。乜嘢領域乜嘢條件情況下政府要干預，用乜嘢方式及工具干預。上次加老人津貼，顯示梁之適度有為，仍然沿用上屆舊一套，迴避全民退保討論。至於對勞動力市場干預，最低工資下一步就係標準工時，究竟原則上政府點睇也要交代，唔可能再拖話要不斷硏究。標準工時、全民退保兩大政策，足以說明「什麼是適度有為」，你話虛，當然唔係，你話實，又未到具體建議，但做特首總要表個態，冇得迴避。
至於政治上務虛當然係普選，目標時間表已有，路線圖上幾個關鍵點也要表個態，如普選行政長官提名門檻高低，2016立法會功能組別修改存廢，一樣冇得避。同樣你話虛，又未至於吹水，至少要有態度，提名應從寬從低、必定要素擴大民主參與成份，你話實，又未到提出具體條例草案。如果民主民生幾個關鍵點都冇態度，就表示佢只係一條古惑嘅廢柴，梁粉們也難再呼籲巿民「比個機會佢做實事」。
按照佢以往明報「筆陣」作文方式，相信會用大量廢話去分析現狀，提出宏觀問題，但就唔會有具體解決方案。由此觀之，下週發表之施政報告，應改名為「香港問題報告」更合適。至於梁粉們在輿論造勢以降低公眾期望，相信效用不大。
