我信振英，「夢熊大師」應該唔係梁營人馬，上周六回港記者會，佢好唔專心，一邊對住咪，一邊左右兩邊望。按照無間道儍強嘅理論，但凡做事唔專心，就一定係卧底。我認為夢熊大師應該係唐營派入去嘅人，佢真正身份叫做……「陳永仁！」
佢不但能夠預知唐唐黑材料幾時爆，又能夠認識北京軍方高層，介紹佢認識社團猛人搞唐唐黑材料，而最神奇佢又大大方方向香港傳媒托出，將北京捲入黑金風雲。兩會期間大師自導自演習近平領導握手祝聖梁營人馬，但又唔覺意被另一位唐營人馬陳永棋目睹佢兩小時前霸位小動作，最後慘遭踢爆。
當一個人做事專門留低手指模，大聲高調，慌死冇人知，慌死記者唔識跟，自爆北京軍方扯線，大師真正身份，呼之欲出。可憐梁營內高手林立，如前廉政專員、商界公關高手、巿建局主席、港英心戰室大師魔僧首徒，都無法睇得清「夢熊大師」乃送上門的屠城木馬。
我信振英係清白，佢太太同賭王姨太、曾德成及鄭耀棠夫人「借庫」也好，「借票」也好，叫曾德成局長在西九聆訊中「借歪」也好，振英點會知情。西九被踢爆翌日，梁太連梁生是否出席當天活動，也向記者表示不知情。我相信佢兩公婆一係好純潔，每日只會談論那些年留學英國美好回憶。
我信振英唔識社團人士，佢差啲連「上海仔」個名都講唔出，當全港報紙已頭版報道時，他似乎對呢位社團猛人一無所知。元朗江湖飯局上，據「夢熊大師」所述，前廉政專員一坐低已表明呢餐飯 AA制，但振英昨日又否認係拉票飯局，既然唔係為咗拉票，點解前廉政專員會無端端表明要夾錢
AA制呢，以免觸犯選舉法例呢？我信振英唔會搞人黑材料，佢知有人搞曾鈺成，所以關心曾主席，兩次致電主席表達關懷。佢又話早有唐唐「私生女」照片，又吩咐競選辦人士刪除檔案。但似乎曾主席感受唔到佢關懷，公開踢爆。唐唐更激，走去報警。
我信振英，由始至終，整個選舉，真係乜都唔關佢事。即使 3月 25日振英成功當選特首，其實都唔關佢事。因為真正令佢當選，係另有其人，將來管治香港，亦係另有其人。日後支聯會收檔、
2017普選特首原地踏步、立法會選舉黑金橫行、一國兩制玩完，統統都唔關梁振英事。
你們信不信？反正我就信了！
