人生如戲。到咗一把年紀，方知道乜嘢叫做仗義每多屠狗輩。你知啦，日日穿西裝，開口埋口講仁義道德嘅人，往往私下最多黑暗之事，就好似金庸小說裡面之岳不群。其實，全世界都有呢類人，只不過大家唔察覺而已。
既然係咁，大家都唔應該對於一些公職人員知法犯法，貪呢樣貪嗰樣，送禮送到西……環之事，感到奇怪。你今日請西環人士食飯，人哋都要搵個理由請番你。一月你請我，二月我回請你，禮尚往來，久而久之，中環／北角／西環之界線，就模糊咗啦。
然後呢，原來人到咗一把年紀，真係有鋪癮，就係去打波。幾廿勾，就退休，唔通去打網球咩？一定要夠高尚、夠私隱，避開狗仔隊，離開香港就更好。香港周邊地區，打Golf就最爽。但係唔通坐飛機出埠咩？最好就係，有一架私家車，響樓下直通接送（政府車唔用得，又會打草驚蛇），去鄰近地區球場開波，打完波晚上直落，咁夜做乜嘢？冇人知啦！總之就響凌晨時分返屋企交人，what
a day!
呢啲事，聽落好陌生，事實上就發生咗好耐。熟悉兩岸之朋友告之，當兩岸劍拔弩張之時，查實兩岸，無論藍綠，日日都響澳門及鄰近地區互動。總之相關人士，早上出發，由台灣到澳門，下午已經唔知響邊處嘅鄰近地區傾嘢直落，嗰啲中間人，個個都有鄰近地區之政治組織銜頭，打點一切，賓至（好賓㗎，賓主盡歡咁樣）如歸，劍及履及，格完一輪政治劍，就會傾搵食嘢，例如對岸電視台落地權之分帳等等。第二朝就食飽飲飽返台灣。
兩岸傾嘢，老早就係咁樣。飲飲食食，平常得很。之不過，香港人響政治上仲係初哥，唔係好明白檯面同檯底事，往往意識形態掛帥，反共就反共，反台獨就反台獨，唔知道其實好多嘢都係做畀電視台觀眾睇。
既然香港已經係中國一部分，呢種操作老早就發生緊。
九七年前，英國佬睇到好實，即使發生都唔會咁「揚」。依家一家人嘛，鄰近地區之中間人，就會好識做咁樣，同香港有權有勢嘅官員做朋友。中間人冇官職在身，手上有錢有地有朋友，彈性好大，隨時咪安排中港車接送，你估個個官員真係刀槍不入，可以獨善其身，而唔去享受一種至尊級之帝王式生活？貪曾出事，咪係咁樣。
好啦！依家事情鬧大咗，會唔會中環／北角／西環的界線又分開咗？冇人知。但係，事情揭露咗，原來西環成日會同紀律部隊之領導食飯，而且幾年來頻繁得好緊要，然後又有人會響鄰近地區撈個一官半職，哈哈！
（二之一）
