[不好意思，本篇比較口語化]
連歪理都不如
睇CCTVB報導陽光時務個研討會，當然係睇下高達斌點樣曲線救國。我估CCTVB已經剪最見得人嗰段，但佢都係好似文盲咁講啲冇邏輯嘅嘢，連歪理都不如，無理可言。佢話民主只係西方近三四百年嘅嘢，係舶來品，香港唔一定要學，應該學嘅係中國傳統文化仁義禮智嗰啲。跟住長毛就嘲笑高達斌，話佢反對中共，因為馬克斯係德國猶太人。
查實四百年前，係萬曆年間，當時仲未有電話，咁點解高達斌又用呢？
同一個場合，陳淨心帶咗班愛港力嚟踩場，在場搗亂，但奇就奇在佢地連搗亂個台型都騎呢過人。
講開高達斌、陳淨心呢啲角色，其實佢地係層級最低嘅爛頭卒，負責攪亂對家個場。佢地賣相差、講嘢無知唔係問題，而且最恐怖嘅係佢地好似乎真係好似好亢奮咁。呢種水平嘅貨色，召集到成班都係同等水平貨色。響正常民主社會，呢班人嘅水平當然係連挽鞋嘅資格都冇，頂多就係一百幾十個極右狂徒嘅頭頭。而家佢地上位，就好似抗日嗰陣，只要肯做爛頭卒，就水平幾差都有得做漢奸咁。
土共水平也不見得好
高、陳呢啲最低級嘅爛頭卒當然係騎呢，但我試過唔只一次潛入西環同土共組織嘅座談會之類，發覺無論係西環官員、土共組織頭面人物、爭住埋堆嘅生意人、土共區議員同黨工，講嘅嘢其實水平唔高得過高達斌幾多，只係流利啲、少啲笑位咁。就算係你電視見到班土共立法會議員，唔理係所謂法律副教授、有錢太子女定係傳統土共，一樣好似鄉下出嚟咁。
土共世界當然有聰明人，不過大體上都係上面講嗰種水平嘅人，佢地好多係活響個封閉系統幾十年，見識有限，新埋堆嘅就物以類聚，一樣咁低水平。不過，有啲人就似乎係扮出嚟，為咗埋班，所以要突出自己有幾左，仲要係左得嚟同班土共一般水準。有啲新埋堆嘅人，例如啲澳洲嚟嘅大律師，本身冇料，但小人得志，財大氣粗，以為自己好巴閉，對住電視鏡頭語無倫次丟人現眼都不自知。
仲有一種人更無恥，就係爭住做三姓家奴嗰種，英國人統治嘅時候就宣誓效忠英女皇，服侍完英國人就服侍中共，甘心做打手，擺出一副狐假虎威嘅嘴臉，為咗表忠，講嘅說話仲衰過土共。以無恥程度計，呢班人比起土共，有過之而無不及。
總之，響西環嘅指揮之下，憑藉無限資源，呢班人就掌握愈來愈多委員會、公帑組織、議會議席。再提大家一次，而家就好似抗日時期，有志之士唔肯賣靈魂，但大把小丑無賴爭住賣，賣相幾核突都有得做漢奸上位。
農村包圍城市
仲有，唔好忘記，而家中共實行農村包圍城市。日復日咁放人落嚟溝淡你地班本來嘅人，人地受大陸教育，唔識你地講嘅咩核心價值，總之土共可以以無限資源發展新移民網絡，日日洗腦。你地班香港人覺得愛港力、愛港之聲、土共水平又低、又言而無信？有乜所謂？人地有好多農村水平嘅群眾支持。
當你有一日一覺醒來，發現周圍嘅農村已經被改造成功，議會投票又投贏你地、政府上下都係佢地、你有份交稅嘅公帑源源不絕支持佢地，人地名正言順咁對你進行人民民主專政，後悔都太遲。
時務論壇-公民抗命佔領中環
