基本法大使王菀之又再發表一番我點解討厭政治言論，實在可笑，一個娛圈藝人，唔識就唔好講，講得多只會錯得多。佢認為菲律賓總統唔道歉、釣魚台事件、有人住劏房有人住豪宅，背後通通涉及政治，既然呢啲現象咁討厭，自然就討厭政治。呢種解說真係冇得頂，不知所謂，相信係長期受TVB劇集荼毒嘅結果。
賺錢唔一定要下跪
社會上充斥不公平、不公義現象，政治上國家軟弱、社會貧富差距嚴重，假如你係nobody，對此麻木、逃避無所謂，因為冇人會care你取態。但如果你係一個年輕人偶像，又係宣傳基本法大使，宣揚一種消極麻木逃避的情緒，就有問題。哈，究竟邊條友搵王菀之做基本法大使？真係眼光獨到。
多少人從政也好、從事慈善也好、從軍也好，就係因為目睹王菀之所討厭嘅「政治」的不公義、不公平，於是長大後便立志改變，呢種故事大家都聽得多。反觀香港流行文化30年來鼓吹去政治化，宣傳犬儒精神，造就了愚蠢白癡一代，以為靠一家人齊齊整整，就可以建立和諧社會，大家誤會消除，和和氣氣。呢種TVB反智文化深入民心，才形成香港順民社會。而一眾主流藝人，莫講話對好多事冇立場，唔用腦，更多是搵食格，大家都知要搵人仔，但正如姜文所言，賺錢唔一定要跪下，挺直腰企起身一樣可以賺錢。以TVB及福祿壽三人為代表之惡俗政治，應受到口誅筆伐。
社會已經改變，群眾上街撐HKTV，正係對TVB為首愚民反智文化不滿，希望可以make a
difference。昔日左麟右李挺23條，搞到自己一面灰，被網民恥笑至今，今日兩人都唔敢太出面為建制推銷政策。可是總會有藝人認為自己比佢哋英明，願意為政府作宣傳大使，但𠵱家社會形勢，山雨欲來風滿樓，任何靠攏建制以為可以搵到着數，最終都會得不償失。
強勢政府就話有jetso，弱勢政府有異味，連在政壇打滾多年嘅建政派政客，紛紛劃清界線求自保。王菀之一係有過人膽識，一係就真係政治白癡。
