響英國讀書嗰陣，老師經常提起，千祈唔好將所有憲政失敗嘅國家，全部歸咎美帝干預，咁樣好容易患上教條主義，神化美帝能力。當時佢舉咗伊拉克（第一次波斯灣戰爭）做例子，講到美帝根本上冇能力控制到薩達姆，出現咗個癲佬悍然揮兵科威特。
同一道理，將今次運動完全歸咎於美帝幕後操縱，都幾搞笑。問題係，假如呢個理論成立，咁樣北方人士同香港Hello Kitty領袖之類高人，連宇宙奧秘都識得解答同分析，冇理由任由美帝響香港予取予求，乜嘢反制能力都冇㗎，係未？
暗嘅唔知，但明人不做暗事，美帝響今次運動方面，只係出咗兩招：
十月三日，美帝老千福出咗一份聲明，撐學生同政府對話。剛好呢，就係響好打得同Hello Kitty 領袖公布接受學生會面之後。
十月四日，幾位前任美帝駐港一哥，寫咗一封公開信，要求政府同學生對話。話就話私人身份，但外交官員，何來私人身份呢。所以件事相當有可疑。呢份文件之公布，就撞啱談判擱置，學生同政府打晒架，有傳會掃場之時。
睇完兩份嘢，其實同過去十九幾年，美帝對香港之政策同睇法，基本上不變：
第一，香港係經濟及金融中心，即係呢個係美帝之定位。冇話香港係政治中心，民主中心，美帝一定會出盡力幫手──搞好香港經濟而已。美帝暗地裡有冇做民主推手？唔知。
第二，兩封信都強調對話。換言之，從美帝之角度，香港方面點都好，有得傾，佢地就OK。傾乜嘢？鼓勵對話，即係對話係基本點，最低要求。不過，兩份嘢冇提到，對話一定要有成果。成果的意思，響學生來講，就係要公民提名同埋廢除功能界別，但係，正常人都知，呢兩個要求要實現，難於登天。既然係咁，除非學生轉軚，否則未開波就拉倒。
咁就去到第三點，拉倒？美帝會點睇？美帝會唔會背後搞搞震？
第三，維持香江繁榮穩定。即係隱含，大家齊齊在香港搵到錢就係最高原則。換言之，如果維持現狀有助搵食，美帝收貨。如果嗌交反檯會搞到大家搵唔到食，美帝就會出聲。
暫時睇唔到反檯會有經濟大滑坡，即係話，美帝可以收貨，就不會施壓。當然，如果北京忽然short咗肯放鬆，當bonus囉。
所以，香江因佔中真係導致經濟亂，美帝就越有理由介入施壓。依家親北方嘅支持者，猛唱香港經濟差，佢地未必知道，唱得經濟越差，誇晒張，隨時會引來美帝口實，讓美帝有理由迫北京出手解決。
美帝響香港事務，最叻謀定而後動，出手到point唔衝動。APEC當前，美帝睇準北京做主人家，要面子，要萬邦來朝，最怕美、日等國，因為香港武力鎮壓有情緒，忽然杯葛，派副手出席就頭痕。親北方人士，究竟乜嘢係大局呢？唔知道中美角力係點樣，應該響搵國際問題專家沈大師問個清楚！
