本地左派出動，認為要將中學通識教育改為選修科，大家唔好以為係亂嗡，相信今次只係打出第一槍，呢次可能係裡應外合行動，現屆政府真係會「鬱」通識。早在舊年反國教運動風起雲湧之前，本地左派已經對通識課程有意見，認為此改革等如變相令泛民在課堂內進行政治宣傳，妨礙國民教育。
通識好多討論，涉及時事，教師會從普世價值、核心價值出發，引導學生討論，而內地就對普世價值特別敏感，尤其近排一路有傳內地展開反普世價值意識形態運動。從內地角度睇，普世價值與國情論係有矛盾，大家不妨回憶搞出反國教風波，浸大那本國民教育手冊，正正就係推銷國情論，換個說法叫中國模式。基本論述係中國有自己國情，一黨執政模式，有利經濟發展。而呢一套論述，最大敵人就係普身價值論。
當香港學生在通識課上接受普世價值討論時，又點可能再會接受中國模式論呢？而本來國教成功推行，可以同通識「不良影響」對沖。當舊年反國教運動成功，阻止國教推行後，既然冇得對沖，左派唯有用玉石俱焚攬炒策略，迫使中學一併取消通識教育。呢個係一個幾根本問題，香港究竟要走向內地化，接受國情論？抑或要堅守普世核心價值，等待內地逐步演變？
以往董建華年代推動教育改革，當年折騰不少教育界人士，最終羅範也因失言而調職，但近幾年教育改革漸見成果，尤其係課程改革，引入通識科作為必修必考科目。改革後學生對本土社會多咗關心，亦對政治、時事及相關價值討論多咗，呢個係好現象，改革旗手梁錦松、李國章及羅范係有功，不容否定，試問擺脫殖民地統治後，難道仍要維持殖民地愚民教育政策？令香港人繼續去政治化，維持政治冷感？
拖延政改 中港觀點漸遠
關鍵係十六年來，世界已經出現钜變，香港同樣受衝擊，即使冇通識教育，香港人同內地在價值觀、世界觀嘅距離亦愈來愈遠，問題不在於香港人心未回歸，冇國家民族觀念，而係內地自八九年六四之後，一直拖延政治改革，而京奧之後更用維穩體系壓制社會矛盾，試問一個學生面對李旺陽、劉曉波等新聞時，冇課堂討論，佢地會選擇企喺內地當權者一邊？絶對唔會！
今次要隊冧通識，將又掀起另一場教育鬥爭，左派對此樂此不疲，可惜香港人又要被迫陷入另一場政治鬥爭之中。
