鍵盤局長陳茂波又發揮Do
something精神，求求其其做D嘢，在網誌中表示有人認為全港有七成郊野公園地，可考慮用來起樓，網誌一出結果係點大家都知，自然群起插爆。姑勿論引述七成郊野公園地資料有錯，單係「有人認為」呢種小學雞式提法，已經笑大人個口。草率馬虎兼論述水平太低，連局內政務官都嗤之以鼻，更何况街外團體。
冇本事
硬抽水
乞人憎
梁粉一直認為要爭奪論述權，死霸爛霸，以為只要有曝光、有Sound bite，就可以扭轉輿論戰劣勢。佢地不妨參考娛圈內採取同樣抽水攝石人策略個案，包括夏蕙姨、漏Mo靚模，用盡方法爭取曝光，到頭來有冇成功扭轉形象？相反另一位七十年代肉彈邵音音，一套打擂台立即彈起，跟手低俗喜劇，成功開拓新演藝生命，專心做好戲，駛乜靠胡亂曝光做攝石人。
冇本事，水平低業餘政客，最好低調，大家應向經濟局長蘇錦樑、民政亊務局長曾德成及衞福局長高永文學習，無驚無險又到五點，專心剪綵做主禮，趁機講一兩句傳媒啱聽說話，咁就唔會露出馬腳。真係要搞政策，交番比常任祕書長做最好，千祈唔好扮勁。陳茂波內內外外比人批評，只有一個原因：扮代表。佢對上有財爺鬍鬚曾及政務司林鄭，入Green Belt起樓，乃政府重大決策，幾時輪到你陳茂波一條茂利出來表態，上兩次無端端搭訕，外邊講兩句，佢就想抽水，話考慮收回粉嶺高爾夫球會及解放軍用地，尤以軍隊用地，已惹起建制派不滿。
攝石人通常冇本事做好本份，捨正路而忽悠，以為人嗡佢就嗡，環保人士譚凱邦一句收回高爾夫球會用地，以往政務官唔會隨便搭咀，因為一旦engage搭咀回應，短期或可成功抽水，討好環保人士及基層，但最終若政府根本無法deliver，只會引起無止境爭拗，而公眾在此過程中也喪失對政府官員信心。陳茂波個人劏房及囤地處理不當，令危機一直揮之不去，累及成個政府，已盡顯此人能力低下，而佢民望愈低就愈想扭轉，胡亂出招，冇章法也冇技巧，若任由他恃住有特首關顧，視上司如無物，隨意開闢新戰錢，政府如何有效施政，重建市民信任呢？如果大家決定打呢場硬仗由自可，若果由始至終只係陳茂波一人亂嗡，咁就得人驚，政府內部已毫無管治紀律可言。
不滿政治攝石人陳茂波，又豈止泛民與傳媒中人，隨時政府中人仲㷫過泛民議員。
