鄺保羅政協大人，你在聖殿裏講道：唔知出咁多聲做乜？好似唔出聲就冇機會、啞㗎啦咁。那麼你呢？只准政協傳道，港人唔出聲冇人話佢哋啞嘅？你說參與遊行要求有得揀的人，完全唔知自己講緊乜嘢，都是羊群心理。應該學耶穌，做隻沈默羔羊，有時唔一定要出聲嘅，無聲勝有聲。
鄺政協，其實你知唔知自己講緊乜？出得嚟行嘅人都預咗要還，他們沒有選擇在你所描述的「咁靚嘅聖堂」裏面扮羔羊為當權者祈禱，反而圍坐中環然後給逮捕，難道都只是政客的腦殘粉？在你這牧者手下的羔羊，冇得揀，眼見你擺耶穌上枱狂抽其水，（我非教徒，但自有教徒跟你依經辯論），也不知他們是你的粉絲，還是耶穌的門徒。好似唔出聲就冇機會？尋釁滋事這索命魔咒，終於正式登陸香港了，「唔知出咁多聲做乜」不就是滋事了？坐等警方抬走，不就是尋釁了？你還覺得香港未壞得咁緊要？啊，因為你唔敢出聲時沈默，信眾以至港人該聾啞時要聽你開聲，所以永遠冇壞的是你。
鄺政協你講道：唔發聲怕會啞㗎啦嗰啲人，因為心靈沒平安，個腦完全唔識分析。那你分析給我們看，你以偏概全，輕佻地批評某些被捕學生投訴要排隊去廁所，不如叫佢哋帶埋菲傭去囉。這又有沒有一毫半分像耶穌所為？人家遊行再靜坐了半天，都快憋出膀胱炎了，唉，就當他們是迷途羔羊好了，行公義也就算了，你怎不好一好憐憫，一如你講道，要用像耶穌基督的柔和謙卑的心去體諒他們，反而把他們視作敵基督撒旦魔鬼般死命得戚地嘲諷？你好歹也兼任香港聖公會大主教，何必還兼演吳三桂？
生命誠可貴，自由價更高；為怕冤屈了你，我竟然花了十七分半鐘的生命，上去聖公會網站聽你講道。又，居然值得一聽，因為從沒聽過如此涼薄、刻毒、無知、冷血，用維園阿伯的口氣與水平去播道，而你的信眾竟然在你挖苦輕蔑地講耶穌時，毫不謙卑地賠笑，我倒抽了17口涼氣。全港基督徒，不論屬哪堂哪會，為保基督教聲譽，都有責任為你之失見證大大發聲。而你心靈之所以能平安，睡得好，你上天堂而要菲傭陪遊行的非信徒下地獄，本身正是最大的神蹟。
鄺保羅2014年7月06日講道錄音
