剛剛聽到馬時亨「好言相勸」正在佔領街道的年輕人，何不自行組織政黨「合法地」爭取訴求。他更出主意，並立即得到梁特首的回應：多開拓青年人的出路來「疏導民怨」云云。
真的多謝馬前局長一言驚醒，這的確是一個好主意。不過不是順着來做，是反着來做。
此話怎講？
就是各位正在瞓街而且正在發愁如何長期抗爭的一眾「廢青」：機會來了，與其長期瞓街，不如長期佔領區議會！ 積極發揮「向上流」嘅香港精神！
話說又是剛剛收到一條信息，就是觀塘區議會剛剛決定用五千萬大元，興建一個音樂噴泉，而之所以決定申請撥款的原因，是「未曾聽見當區居民反對」。那當然啦，觀塘區議會主席陳振斌先生是「積極反佔中」的人物之一，對於如何「回饋街坊」，自然有他獨到的心得。而實在政府早就前就在施政報告中確定「親疏有別」的政策，安排了每個區議會都可以額外申請一億大元，用於「社區工程及康樂設施」。
嘩！ 一億喎，各位廢青見過未呀？
至於每區一億大元，可以轉化多少用於「維穩費」？ 為何每區都有特別長者服務、蛇齋餅粽樣樣齊？ 區議會這個設計真係「越看越可愛」也。
錢花在那裡？ 例如著名的「景點」包括：深井的「地標」造了一隻鵝。不過點睇都唔似當地著名的燒鵝！ 而更像一隻沒有「鵝髻」的肥鴨！ 其實何止深井，實在香港「區區有趣怪」，只要大家忍得住唔笑，這些不花白不花的錢，到處都派！
而即使主導唔到一整個區議會撥款俾你使，起碼作為區議員，都可以充份發揮「不合作」精神，起碼在撥款之時，確保「鵝要有髻」或者「音樂噴泉真係會噴水」之類。否則撥款有多少會轉換成維穩費，真係神不知鬼不覺也。
況且，區議會並會任何「經驗」要求，即使係無業游民，只要有選票，一樣可以坐進議會做「尊貴的議員」。每個月準時有糧出。再者，又是2013年，梁特首為預支維穩費，隨了每區一億元等你申請之外，更將區議員基本薪酬「暴升」34%！由每月約2.5萬元，提升至每月接近3.5萬元！
除了基本薪酬之外，其餘尚有大量「實報實銷」的使費。例如「營運開支」加到每年四十萬元以上，用於聘請助理以及活動開支等等 （唔知私煙條數點計…..）。此外還有「開設辦事處開支」補貼十萬元等等。真的五花八門美不勝收。
大家明白了沒有？ 咁大隻蛤乸隨街跳，不拿白不拿。
好了，可行性如何？
其係「低莊」到笑死。因為每個區議會的議席，所需要的選票其實唔使三千。真係唔講笑：每個區議員唔需要三千張選票。
唔信？ 大家掙大雙眼，望清楚2011年區議會選舉統計：
按政府公佈的區議會選舉統計，每個區議員得票只係「2,866.04」票！
而當中「表表者」係「民建聯」，每席只需2,074票。相比「民主黨」就真係失禮死人，每席要4,377票！ 何其「唔經濟」也。至於天下第一大笑話，由「人民力量」穩坐冠軍：每席盛惠23,465票！
至於「鐵票」的示範，是新界社團和勞工社團，每席真係唔使二千票。
當然，不是每個選區都「等量齊觀」也。至於為何建制派的「配票」可以如此順利？ 與其怪責泛民唔做好地區功夫係冇意思嘅，因為不論你如何做好地區功夫：「認真你就輸了」。
對手根本冇打算同你認真競選，只需要確保維穩費陸續有來就是。你同人講心、選民同你講金，唔該慳番啦各位。
至於每區的已登記選民同樣「一面倒」，越是「悶死」就越不會有競爭。而老人家係最唔怕悶嘅。這個數據，上次已出，今次不重複了。
每個區議會議席所帶來嘅金錢收益，薪酬加福利加開支….每年差不多有一百萬！ 即使冇額外撥款，作為區議員，可以合法使用地區設施，換言之：瞓街的人有福了，可以瞓入區議會，仲可以申請活動撥款，回饋選民，一舉多得，何樂而不為？
各位手握高科技嘅年輕人，唔係想同我講….你每區聯絡唔到兩三千人呀？ 咁削呀？
