最新港大民調顯示，18 至 29 歲的年輕人中，有七成反對梁振英出任特首，而特區政府支持度也大幅下滑，滿意淨值下跌至負 18，真係「該煨」。
輿論正在傳出中央執行 B 計劃，梁下台只是時間問題，有記者兜口兜面問梁，佢只可以答一個字：「冇」。
建制派反梁 恐陸續有來
究竟有冇 plan B？大家只係估估吓，2005 年董建華下台前，年初到北京開兩會前夕，董本人仍未知，但其他人已傳到通晒巷，所以梁今次應該冇講大話。中央何時執行 B 計劃？唔係咁重要，當人人都相信佢會落台先至大件事。
首先建制派會保持距離，唔會死挺政府，因為一旦有變，會一齊陪葬。近月見到工聯會、民建聯好低調，自由黨更借反對擴建堆填區起義，擺明同政府對着幹。政府弱過雞，任何政策要闖過利益集團，都會引發更大政治危機，上屆政府本已埋尾興建新焚化爐，經過梁振英 call 停擱置，如今再上馬，當日支持力量已煙消雲散，要重新糾集建制力量上馬，真係睬你黃錦星都儍。
本來身處弱勢應該
耷低頭密密手做實事，聚焦做好一兩件大政策已足夠，但唔知邊個咁好橋，竟然搞個「家是香港 」純PR 活動，結果又係俾傳媒冷嘲熱諷。避開爭議施政，專注派糖派福利又如何？唔派必死，但派也不一定可以賺到民望。因為巿民對政府不滿係信任問題，而非不滿某一項施政。年輕人受惠派糖少，老年人得益多，但政治活躍階層是 18 至 29 歲，所以越派糖越反感，董建華是死於政治，而不是民生，04 年已走出
03 年沙士谷底，但群眾不滿未減退，7.1 仍有 20 萬人上街，才導致中央決心換馬。
梁陷政治困境，相信中央及建制派中人都有提過意見改善施政，但最終佢仍然係一意孤行，呢種作風先至死得人。曾蔭權自 2008 年擴大問責制後民望下跌，只有進一步靠向民建聯及工聯會，凡事出台前同幾大頭頭先摸底，還有不能太着重政府尊嚴權威，在建制派前放下身段，咁先至能夠捱下去。
特區政府今日變了「 毒男 」，政策出台只有局長單打獨鬥，冇啦啦隊、冇小罵大幫忙之議員、學者及社會意見領袖，拿了政治酬庸者，只會更加袖手旁觀。自由黨切割只係第一步，最怕是跟住陸續有來。
建制派大佬幾經風浪，由老董、煲呔捱到今日，個個成精。要保命只有跪求曾鈺成、棠哥與嫻姐一途。
