建制派近日討論行政會議改革方向，曾鈺成「今非昔比」論屬政治不正確，引來批評，之後佢具體提出檢討集體負責制及保密原則，背後假設是將行政會議變成建制派執政聯盟，同日中策組前顧問劉兆佳認為行會可蛻變成執政內閣，以問責官員為主，再加入政黨代表，兩人意見相近。
表面看來似乎可行，但執行起來困難重重。
根本原因係特首不受政黨制約，而建制派各黨只係鬆散政治聯盟，在基本政治問題上以北京馬首是瞻，但在民生政策上南轅北轍。如果要將行政會議變成執政內閣， 特首及其任命內閣官員先要交出政策主動權，重新與建制派黨魁商討五年核心執政綱領，若不獲共識者，便要放棄。呢個係根本改變了行政主導體制，行政機關變相 與立法會內執政聯盟分享權力，甚至交出主導權予民建聯、工聯、新民黨等。
特首虛位化 只做內交
曾蔭權 05 至 08 年民望高時，可以實行特首主導，毋須理會建制派，可以直接訴諸民意，建制派不滿也只能一邊鬧一邊支持，08 年民望下跌，佢立即改變策略，放下身段向鄉事、民建聯、工聯乞票，比嫻姐寸爆也笑笑口唾面自乾，咁先捱過下半段任期。但梁振英上場有自己鴻圖大計，也部署 組織梁粉班底去執行，同曾蔭權頭兩年一樣，但因班底騎呢弱雞，出師未捷身先死，提早進入分權階段，被迫受制議會多數派領袖，曾鈺成出招，其來有自。
其實即使有民意支持的美國總統奧巴馬，任內也處處碰壁，在財政懸崖問題上民主黨議會黨團、多數派領袖，共和黨領袖自己傾，直頭當奧巴馬冇到，而奧巴馬亦與 華盛頓國會山一套政治交易格格不入，變成局外人。但佢至少有民主黨多數派領袖波洛西護航、帶路、探路。但梁振英同本地政壇主流格格不入，梁粉更係一堆游談 無根口噏噏的「嘰嘰軍團」，連劉江華都唔會尊重佢哋，偏偏成棚人要做大龍鳳，乜都想搞搞。
梁振英別無選擇，只有同議會多數派聯盟分權，聽命於政治盟友。好多人認為 Plan B 係換特首，其實應變計劃可以係將特首虛位化，專門搞「內交 」，重大政治工作交予中聯辦、民生施政交予政務司及執政聯盟定 agenda，回歸專業政治，「灌漿加固 」，或可暫時渡過危機，但恐怕不能重建市民信任。
政治上，要搵幾件局長、行會廢人開刀，炒幾件先有轉機，吳克儉可能成頂頭大熱。
曾鈺成再談行會變革
日前慨嘆現今行政會議作用不如港英年代，提出應檢討行會機制的立法會主席、民建聯議員曾鈺成，今日再次公開闡述自己對行會現存問題的看法。
曾鈺成被傳是北京換特首Plan B的欽點對象之一，他今天也有些像候任特首，侃侃而談行會和政治環境八十年代至今的變化，以及須要面對的問題。
《星島日報》今日刊出行政會議召集人林煥光的專訪：林煥光指曾鈺成「有選擇性的回憶」，認為目前沒有全面檢討行會機制的必要。曾鈺成在立法會主動向記者「澄清」，自己並非批評現屆行會，但希望政府實事求是去回望回歸以來，行會制度上的問題。曾鈺成信心十足地論述自己的理念，指行會「保密」同埋「集體負責」兩大原則或要檢討。更援引前港督彭定康92年的發言，以示英雄所見略同：
事實上，曾鈺成早於兩週前一次有線電視專訪中，直斥高官問責制失敗，批評司局長與特首貌合神離，雖無點名，但說及並暗諷「現任特首」；曾鈺成當時亦有說到行政會議，指出一旦落實普選，特首及立法機關由普選選出，但手握大權的行政會議卻是委任，認為有需要深入探討普選落實後，行會的過渡問題。
譬如我見到有一個明顯嘅矛盾，彭定康係92年已經指出嘅；喺2002年董先生推行問責制嘅時候，又一再浮現嘅。
就係如果我哋希望有唔同黨派嘅代表，坐喺行政會議裏面，係能夠幫政府去爭取呢啲黨派，喺立法會裏面支持政府政策嘅時候，「保密」同埋「集體負責」呢兩條原 則，係唔係重要嚴格去堅持呢？如果繼續有呢兩條原則，會唔會妨礙咗呢啲政黨嘅代表，去爭取議員支持政府政策呢？呢個係值得探討架喎！呢兩條原則呢，喺基本 法入面冇寫明架喎。
我希望行政長官同埋政府，包括我哋嘅行政會議成員，以一個比較開放嘅態度，實事求是去睇回歸以來行政會議嘅運作，係有好多值得探討嘅問題。
