■林煥光等較受公眾信任之開明派，原來亦只係為梁振英錯誤決策站台背書。
周日反傳媒霸權遊行，聲勢同舊年反國教相似，山雨欲來風滿樓，今次封殺王維基，已經辣㷫咗一班唔係咁政治嘅市民。今次梁振英會同行政局推翻通訊局決定，破壞程序公義，已經好核突，仲要逆民意而行，又唔交代，乃近年最得人驚及粗疏嘅決定。
行政會議召集人林煥光回應事件，指決定是由特首作出，行政會議有保密及集體負責要求，難以交代討論過程。但從政治問責角度而言，梁振英作出如此逆民意決 定，行會召集人竟然扮評論員，置身事外。仲記得當日林煥光被指兼任行會召集人及平機會主席，存在角色衝突，佢一度好「霸氣」地回應指若公眾認為有衝突，佢 會毫不猶豫辭去召集人一職，何其有原則？
開明派原來係花瓶
今次電視牌風波，梁振英獨斷獨行，冇規冇矩，並且要行會成員為他個人決定集體背書，林煥光竟視若無睹，以為事不關己，實在無恥。
單係決策逆民意一項，引致八萬市民上街抗議，令政府陷入政治危機，已足以下台。從現實政治層面來睇，林煥光、胡紅玉等較受公眾信任之開明派，原來根本係花瓶，功能係為梁振英錯誤決策站台背書，兩位撫心自問，所作所為，究竟係為香港定害香港。
我唔相信兩人係戀棧現屆政府行會權位之人，當日林煥光出任召集人後向傳媒說：「加入行會是希望在政府政策上做最後把關，防止惡法出台。」今日選擇性發牌，置官僚理性不顧，事件係在林把關下發生，我哋點會相信佢有把關嘅腰骨。
前公務員、中間派及溫和民主派願意同梁營合作，天真幼稚地以為可以影響梁決策，以免特區施政惡質化，而梁振英亦無意同佢哋分享權力，只係「碌卡」，利用佢 哋冇咁左及核突，爭取民意支持決策，提高決策公信力。由梁上場至今，搞出大小政治危機，都因梁粉及梁本人心術不正，而內部對此也無法制衡。如果傳媒報道屬 實，張志剛主導行會討論，咁即係說明中間派參與決策嘥氣，所謂把關只係自欺欺人。
今次事件會越鬧越大，因為依家發難係一班普羅市民，唔係社運、民運、政黨及工會人士，民眾憤怒出乎意外，更大鑊係政府冇方法推翻發牌決定，除非司法覆核法庭判政府敗訴，換言之，往後雙方對立根本冇緩和方法。
周日通往中信大廈天橋上，我睇住黑衫軍如潮湧至，俾梁振英咁搞法，佔中點會少人！
對林煥光的期望似乎是一廂情願, 其實呢位阿伯一向扮中立持平, 説話模糊, 見民意沸騰就話政府應解釋, 你係行政會召集人, 講到唔關你事咁而臉不紅耳不熱, 都可謂境界甚高. 除了阿伯外, 泛民啲議員又何嘗不是呢? 個個得把聲, 有姿態冇行動, 外表兇恨, 內裡XX. 香港人要點唯有靠自己啦!
