香港本地大學收內地生越來越多，研究生比例更得人驚，內地生早已超過本地生。有人相信內地生來港留學，會受香港自由氣氛感染，返到內地會變成推動社會進步力量，所以從大局而論，多收內地生有好處。如果抱有呢種諗法嘅人，我建議大家睇睇一個內地90後，叫鍾道然嘅年輕人作品，書名叫「我不原諒中國教育」，大家會更理解來港留學所謂高考「尖子」，實際內裏係一班乜嘢人。
作者讀名牌中學、大學，十四年以來親身經歷內地教育如何消滅年輕人性格、思考力及批判力。由小學生年代起，已經將小朋友變成信奉權威、信任「口號」、又充滿競爭意識嘅小老頭，在體制內表現越好，就代表呢件產品越符合共產黨quality control標準。即係冇諗法、冇獨立思考嘅考試機器。至於進入中學，control更嚴謹深入，利用應試的訓練，將學生變成「專業人材」，專門應付考試嘅人材。
作者過來人身份觀察，指出內地扭曲之教育政策，應試教育只是冰山一角，更根本問題係中國人才培養、人格塑造等深層次問題，將年輕人扭曲成為只知競爭、勝利，人格欠缺全面發展，仍停留在物慾層面嘅空心人。
呢種長時間受到束縛及壓抑嘅年輕人，來到香港讀大學，會否有根本性改變，抑或只不過係另一種功利主義下嘅「競爭策略」，搵方法留低工作，或作為踏腳石再移居美加。
內地中產無視不公義
八十年代好多人誤信當市場改革持續，內地出現新中產階級時，會促進內地向民主過渡，大家忽略咗教育政策一環，其影響力足以將中產提早閹割，扭曲成為只重視改善個人處境，而無視整個制度及社會之不公義。有乜嘢人民就有乜嘢政府，三十年多少大學生晉身中產，六四至今廿多年，一群又一群年輕人有車、有樓、有消費力，有自由行來港掃貨，但就此而矣！
中產要有精神上覺醒，而內地教育政策下培養出一大批「不能懷疑、不准批判、不會分析、不想實證」嘅強國精英，反而成為跟政府合作嘅「和諧穩定」力量。
好多香港獅子山下的一代已上位當高官、教授、僱主、專業人士，佢哋愛貶損香港年輕人，讚揚內地留港尖子。假如用上位一族標準去作評價，內地生成熟、服從權威、專業能力好，但香港學生，至少會似番一個年輕人，會上莊、跳hip hop、做戇居嘢、反對港視發牌、替許志永鳴不平。
你以為將內地生比例提高至百分之二十，中大踩入深圳辦學，就可改變中國年輕人，改變中產、從而改變中國！未免太天真！唔信？你睇睇在港留學一班叻仔叻女，會為許志永判囚四年企出來講句公道說話，才不會！