群情洶湧聲討梁振英封殺香港電視之際，政總獨欠主角王維基，大家心中都有問號，究竟事到如今，仲信梁振英可以幫佢搞掂？畀佢收購亞視？唔係咁儍吖嘛。好明顯王維基之動作，有古怪。林煥光已講到明今次封殺維基，乃梁振英朝綱獨斷，行政會議討論後冇表決，冤有頭債有主，市民上街聲討梁，王維基反而發聲明，隱隱晦晦乜嘢一小撮極端分子搞分化，究竟邊個先至係呢一小撮人，係CY、張志剛？定係泛民？
不想破局 暗線梁粉
王維基好明顯唔想破局，但新電視牌一事已無可挽回，佢同CY維持良好關係，所為何事？江湖傳聞維基乃暗線梁粉，一直相信曾蔭權無法完成發牌，CY可以搞掂。早前有單官司佢告《信報》誹謗，仲要針對反梁才子游清源，大家已覺佢行事奇怪，一時間分不清是人是鬼。而更令人不解係封殺決定並非上周才知，但梁振英馬虎草率地公佈決定，事前不放風測試水溫，預早堆沙包消毒，事後一味以行會保密拒絕解釋，明顯要挑起民憤，好似要谷人上街咁款，成件事實在太多不解之謎，梁王之間，must
be something。
可惜人算不如天算，好多人對雞汁May姐獎門人BBQ煮個麵你食等反智TVB心有怨恨，加上梁振英也成喪屍，做乜都死，所以群眾反應比兩人估計激烈得多，結果維基變了英雄，一個佢最唔想扮演的角色，群眾希望佢做時代巨人，佢就匿屋企做侏儒。政總集會上，港視員工一直強調唔搞政治，相信係王維基落order，但市民對成件事則從政治角度解讀，認為係政治干預，爭取電視巿場開放，給予巿民更多選擇。
王維基取態，涉及整個群眾運動發展方向及氣勢，當日反國教運動成功，乃學民思潮鍥而不捨，發動學生絕食，鼓動更多市民參與。當今日行政會議之後，政總示威香港電視工會人士散去，運動延續將成問題。我希望自己估計錯誤，王維基曖昧，不過是源於一派商人，對複雜政治不了解，幼稚天真以為可以置身政治之外。
但無論如何，電視發牌已導致另一次建制分裂，行會、公務員、主流商界、泛民及建制政黨趁機宣洩對梁累積的不滿，群情洶湧，即使王維基低調護梁，也阻止不了這個危機出現！