港台周一播出《鏗鏘集》，題目係愛國愛港，成集都係用曲筆去刻劃，所謂愛國愛港係不斷改變，其中一段關於紀念五四運動活動中，兩位穿校服之女學生，回答記者提問乜嘢係五四精神，不約而同答係尊重與包容。此片段在網上熱傳，網民反應熱烈。
當時我睇緊《鏗鏘集》，已即時爆粗，「有冇搞 X 錯！」問題不在女學生，而係幾時開始將內地扭曲歷史的五四觀引入香港，同時心中難過係受訪學生，穿着香港校服，典型乖學生，由佢地口中講出五四精神係尊 重、包容，出自香港下一代之口，你話幾得人驚。政治灌輸與洗腦，不知不覺間已經完成，產品也推出了市場。
尊重包容竟變五四精神
八十年代念中學，邊個學生唔知五四精神係民主與科學，德先生與賽先生，文化上要反傳統，政治上聲討北洋政府，喪權辱國，青年學生上街。
共產黨建政後，一方面唔敢攻擊五四運動，因為不少學生走上左傾 ， 皆源於五四，但又怕五四民主與科學精神，被用來挑戰共產黨專政，於是便為五四運動進行整型手術，將五四扭曲成為只有愛國主義，而將其他部份以手術切除。紀念五四變咗升旗禮，本身已經係一種愛國主義宣傳。
本地左派當然在五四升旗禮上，繼續上下其手，針對當前中港人民矛盾，樹立「尊重、包容」宣傳句語 ，無知學生因而受騙而不自知。追本溯源，在於梁粉紅人羅范椒芬當年出任教育局常任秘書長，與李國章局長雷厲風行，教改紅旗四處飄揚，其中課程改革中取消初 中必修中國歷史科，今日回望才驚覺刻意貶低中國歷史科正好為日後政治教育、愛國教育等洗腦活動鳴鑼開道。當一個中學生在課堂上從未學過五四運動歷史，冇學 過近代史，一旦遇上扭曲歷史之政治洗腦，根本無從抗拒，比政治寶藥黨呃咗都未知。
共產黨以政亂史，用黨定下的政治角度去詮釋歷史，將之變成一種管治控制意識形態。過去幾十年如是，但今日新媒體時代，人人可以翻查歷史資料，國外學者研究，內地亦已經冇人信呢套史觀。本地左派將劣等貨色運來香港，為學生洗腦，香港人應對此口誅筆伐。
左傾愛國冇問題，但至少唔好咁低 B 庸俗！