三月二十五日，農曆乙酉日，係月破日，諸事不宜，但今天是香港選特首嘅大日子，一定要百無禁忌。大球場有七人欖球賽決賽，四萬餘人入場，外國人士雲集，勢必興高采烈。沙田馬場跑馬，有中大校友會聯會盃（第四場，下午二時十五分），跟住直播日本高松宮紀念賽，預料大量馬迷入場。在灣仔會展呢，室內有行政長官選舉， 1193名選委投票，室外就一定有爭取特首普選，反對小圈子選舉嘅示威。壹仔話梁振英時代到臨，以後實施鐵腕統治，今天的示威以後是否得到警方容忍，好難講咯。
梁振英一度憑民調民望高，逼迫唐英年。選舉前兩日，梁振英民望支持率已跌到 31%~38%，視乎你睇邊個民調而定。無論係 31%或 38%，都係一個低民望數字，低過昔日董生曾生好多好多，故此梁營一早宣揚唐英年以低民望當選嘅話，有十萬人上街抗議，但今天梁振英若因北京直接強力干預而當選，難道在七一冇六七萬人上街示威？呢個星期，國務委員劉延東南下深圳召見富商，中聯辦副主任黎桂康到中總會見挺唐選委，顧不得保留身段，躲在屏風後示意了，直情赤裸裸上陣親自為振英哥拉票，呢筆政治高利貸，振英哥以後唔知點還。事實上，如果振英哥憑本身感召力、能力、包容力，可以自己搵到
601票嘅話，駛乜劉延東南下親征，向各板塊商人施壓？依家中央不惜河水犯井水，直接扮演抬轎佬角色，夾硬抬梁振英入禮賓府，呢位「兒皇帝」毫無威望又無強勁班底，在七月一日後如何管治香港呀？
商界選委是否真的屈從中央，棄唐轉軚，改投梁生一票，冇人敢講，一位極力挺唐選委就預測今日流選嘅賠率熱到無味，流選機率甚高。或如李怡（三月二十二日）所言，選委現在可理直氣壯投唐英年一票；泛民既無勝望，如果識諗深一層嘅，應聽從李怡之言，切勿以為係開玩笑。總之各位選委今日肩負大責任，香港未來五年的前途，靠晒你地嘞。順從 75%民意嘅話，就係投白票。