大家有冇諗過，梁振英三次落區，究竟討論過乜嘢？有乜新承諾？又有乜意見係以前冇聽過？答案係「冇」。有人認為政客做show，內容唔重要，都係阿媽係女人，急市民所急，政客親民姿態更重要。咁大家又睇睇佢三次落區，姿態上傳遞了甚麼訊息。
第一次在天水圍由社團人士組成維和部隊護航，在場外毆打示威者，又搵來一個肥仔茄哩啡扮受傷，被傳媒諷刺為黑色梁粉，事件不了了之，但政治上損害整個特區政府形象，而黑色梁粉正是去年將林鄭月娥紮成紙人詛咒焚燒同一班有勢力鄉紳。
第二次落觀塘功樂道，冇黑人物護航，但就變成戒嚴，場內比菲律賓人質事件死難家屬質問，灰頭土面，又係蝕章。
昨日灣仔第三次，場內全數建制派群眾，只有女長毛一人抗議，場外就愛字頭人馬唱歌跳舞，一個正常土生土長香港人，見到梁振英支持者，全部甩頭甩髻，騎呢古怪，點會buy？最後仲怕示威者要逆線掉頭鬆人。究竟邊一個場面有顯示到梁振英親民一面？答案當然又係「冇」！
內容冇料到，場外亂七八糟，政府中人都問究竟點解仲要搞？其實，主要係梁振英「鬥」心強，一直認為要學克林頓，要不斷選舉，每一刻都似在打選戰。你見到佢死唔肯放棄個「齊心」口號，落區個setting坐櫈仔，已知道佢當落區係選舉工程一部份。
單靠形式 沒有內容
「不斷選舉」無疑係政客工程，但要做到似模似樣，靠呢類低水平落區show，基本上冇用，因為外國政客show唔可以單靠形式，仲要有內容。內容就關乎政客價值理念，手上有冇重大政策議題要闖關，係咪穩站主流。例如美國醫療改革，打破醫保集團暴利壟斷，本身已站道德高地，落區做勢提高民意支持度，反壓美國既得利益集團，迫共和黨支持。
究竟梁振英核心施政內，邊一瓣要打民意戰？普選唔敢有立場，起公屋根本冇人反對，真正要打民意戰嘅，佢掂都唔敢掂，例如全民退休保障、全民醫保，要打低專業及工商界利益，巡迴全港十八區爭取民意支持全民退保，咁先至係「不斷選舉」。𠵱家根本冇agenda在手，冇issue，純粹務虛做show，聽聽民意，如此低水平落區，必然會俾人鬧。
香港回歸16年，政客仍停留在業餘區議員水平，誰之過？
病態常態化
我愈來愈相信梁振英係一個外星人，週日地區論壇垃圾Show後，梁振英竟然形容論壇秩序「一場比一場好」，又指這是「民主政治向前發展必經過程」。他又說，民主生活及決策程序「不能夠有躁動」，希望昨日會場秩序良好是個「好開始」，日後論壇可「常態化」、「正常化」。如果梁心目中香港政治生活係如此水平，大家不如搬返內地住好過，橫掂香港同內地已經一體化冇分別。
假民主當賣點
大言不慚
稍有常識者都知道呢類以鼓掌形式進行之所謂論壇，乃一場經過策劃安排公關show，出席者以建制派地區椿腳安排街坊為主，為搶籌安排旅遊巴一車一車送老人家來，基本所謂街坊只係「一堂景」，試問一個正常香港人，有乜迫切性要倒塔咁早去輪籌為見梁振英。翌日聽眾致電電台踢爆，指要老人為梁撐場一早輪籌，為咗區區幾百蚊，實在有虐老之嫌，亦有聽眾比作北韓領導公關show，結果又係犯眾憎衰收尾。
本來呢類公關Show走過場，不過係在施政報告前後扮聽民意，不要自己呃自己，當作真係與民溝通。以往老董也好、煲呔也好，明知係假嘢，出席者乃世界Fans，所以都唔會自吹自擂。偏偏梁振英就將假民主假親民當作自己賣點，大言不慚，無恥地形容為秩序良好是好開始，仲扮哂代表指民主生活不能夠有躁動，訓示香港人。究竟梁振英係乜嘢人？將一場用錢買fans嘅地區show當真，佢究竟係咪有病。
香港逐步變澳門、再變深圳，大家有目共睹。為咗梁振英自我感覺良好，動用七百警力佈防，用小便宜引老人撐場，場內三人跟足內地領導casual打扮，齊做山寨領導，建制派人人可以換籌，唯獨長毛唔得，CCTVB新聞用近廿秒播出高達斌挺梁聲明，梁振英最終竟然可以逆缐行車避開示威人士。成件事由天水圍黑色梁粉維和開始，一個正常香港人都會覺得呢個政府有病，處事冇規冇矩已到了底線。但在梁振英眼中，竟然是常態化好開始，將病態常態化，正是梁施政一大特色。