數學家丘成桐批評香港大學生重抗爭忽視讀書，引起年輕人熱烈討論，近日中大講師邵力競在《信報》撰文力撐丘成桐，指摘網民批評丘成桐係上綱上線，邵文指大學生學習態度欠佳，冇大冇細，上莊dem beat文化冇水平，一窩蜂起哄。其實丘及邵文章都問錯問題，自然得出了錯誤答案。
大學生hea住讀係事實，不少人無心向學亦係事實，但同佢哋熱衷搞社運，兩者並無必然關係。如果係廢柴學生，根本連社運也唔會參與，參加danso、校草選舉、玩dem beat好過，點會理乜嘢國教洗腦，坦白講，hea爆學生肯跟大隊參加社運，已經還得神落。
唔讀書與搞社運無關
無心向學同參加社運係冇因果關係，丘成桐連基本邏輯都搞錯，真正轉變原因係大學生今日已非社會精英。七、八十年代考入中大港大，自己會視自己為精英，對自己有一定期望，要玩得又讀得，搞社運、學生會、國事，邊個唔叻仔，GPA三點幾。即使為學生會工作而defer，亦會睇好多書，至少要扮勁，開口埋口講到幾句法蘭克福學派批判理論，呢種精英心態係鞭策學生向上原動力。
今日大學普及化，雖然入港大、中大及科大仍然競爭激烈，但大學生身份已冇咗精英光環，佢哋亦當自己係一個普通人，對自己要求亦降低。佢哋最熱衷唔係上街反洗腦或撐長毛，而係去搞O Camp、做組頭、搞舍堂活動、上莊一齊做dem beat，dem beat係指大群學生在搞活動的時候，穿着代表自己屬會或學院T-shirt，然後一字排開，一邊用腳大力踩地，用手配合打拍子，另一邊大聲叫喊口號，一大班人玩得好過癮，dem beat成為今日大學生文化代表。我同代不少大學教授對dem beat文化不以為然，認為幼稚兼低能，又擾民，但學生卻樂此不疲。
呢種大學生的中學生化現象，由港大至樹仁都一樣，而積極投入社運、關心社會那一班，反而係最覺醒、最有社會意識的學生。丘成桐唔好搞錯，屬會上莊、玩O Camp、做組頭、dem beat全部同抗爭社運無關。