梁振英大搞金發局、經發會及大小十幾個委員會，當然唔係儍，目的只有一個，就係向官僚奪權。由未上任已搵定高靜芝負責日後安排梁粉當公職，另組政治銓敘科，已知道佢早有計劃向官僚集團開刀，可以預見董陳之爭，十三年後再現江湖，大家買定花生擔定櫈仔等睇好戲。
政府管理不外乎控制三大項資源分配，即人事、錢財及土地，人事傳統上控制在由公務員出任之公務員事務局長手上，實力派常秘可以不理問責局正副局長瞎指揮，教育局便是一例，成個局政務官冇一個放吳得掂局長在眼內，因為政務官升遷調動吳得掂冇say。錢財則由財爺、金管局、庫務局緊抓，特首都冇say，但凡政策局有新建議，定要經財務科審核，一坐低講唔夠十分鐘，呢班業餘政客出身之局長連一個新紮小AO也説服唔到。至於土地，由財爺下邊土地督導委員會睇實。北京早知CY古惑，所以先將舊政府財金班底留底負責睇場，昅實盤數。
CY要大權在握，首先要搞掂曾俊華，因為相比政務司林鄭，佢官階雖然高，但法定權力小之又小，比唔上財政司。金發局及經發會成立，係明正言順將財政司在金融及經濟政策之大權移交比特首及梁粉。所謂產業政策，不外是官商勾結尋租行為，當年董建華想搞科技製造業，引入老友田長霖之老友漢鼎亞太來港設廠生產圓晶，漢鼎一開口就係要土地、稅務優惠，本來已過關，但最後要求容許由深圳輸入外勞，就比政務官打沉。可以預見經發會下之產業龍頭，如董建華家族東方海外航運，最希望當然舊事重提，起十號、十一號貨櫃碼頭，CY要投桃報李，一定要bypass財政司及財務科，糾集一班梁粉及董建華之子，唔通真係做學術硏究咩？
環顧世界產業政策本質都係搵政策著數，利益傾斜，不外乎幾招，如補貼，平價土地、稅務優惠、外勞政策，由政府用政策協助降低企業生產成本，這非獨是CY問題，但在民主國家受公眾及議會監督，在香港就變成利益輸送。政務官一直反對pick the winner，係因為知道大門一開，洪水湧入，整個政策理性瓦解，變成自己友主義，即人人靠同CY關係辦事。
呢種用政策輸送利益比梁粉之新官商關係，應該點樣稱呼？可稱之為梁粉主義Cyism。