梁振英第一份施政報告，真係睇到火大，心諗本來都冇期望，但真係估唔到空泛到如此地歩，當巿民係儍仔。
首先選舉期曾經對佢有好感巿民，全部成了儍仔。施政報告大幅從當日選舉政綱後撤，而且退得好「鬼鼠」，側側膊，以為大家唔多覺。公屋建屋指標原本承諾三萬 五千個單位，又指香港大把地，只不過政府未善用土地。施政報告大縮水，五年內只維持曾蔭權一萬五千個單位，到2018年之後五年先提高至二萬個單位，有冇 搞錯。當日擺明係呃人，為求民望，亂嗡當秘笈。
選舉政綱承諾推動硏究標準工時立法，宜家又縮水變成只係硏究未來方向，選舉論壇表示冇需要興建焚化爐，而家側側膊，施政報告唔敢講，怕比人插，由陸恭蕙向外透露要起焚化爐，擴建堆填區。
佢當過去半年幾十萬上街表達民意市民係儍仔，完全冇回應誠信、管治危機、融合矛盾，絲毫反省欠奉。社會因為佢而撕裂，作為特首，有必要去重建社會共識，而 唔係進一步擴大矛盾。但佢竟然當無事發生過，一句都唔提，普選求求其交兩段算數，根本就係一種不將市民放在眼內姿態。行文仲寸寸貢，叫年青人諗清楚，若堅 持環保、保育、反東北發展，將來冇地起樓，受害是今日年青人。梁振英一貫鬥爭意識又出現，將矛盾擴大對立，迫人歸邊。香港係有地，無需要在綠化地及重新填 海起屋，因為大量新界土地預留比原居民起丁屋，為何回歸後新界人在住屋仍有特權？
至於民粹式建屋運動，更加得人驚，一位退休高官同我講，認為佢痴缐。將細幅政府用地改為起單幢公屋，會引發社區矛盾，社會更形分化，單幢公屋幾百個單位， 效用有限。好似佢提到放寬半山區及薄扶林交通及高度限制，亦肯定觸發原本居民反對。全香港市民只為房屋政策服務？有冇搞錯，一切發展要為房策讓路，呢種當 年八萬五遇神殺神、遇佛殺佛、寸土必爭的全民建屋運動再現，香港為此必定付出沉重代價。我保証到2018年，大建公屋開始時，房屋需求可能已經消失，因樓 價已下調，大家似乎唔再記得03、04、05年居屋長期空置冇人要。
比梁振英當儍仔仲有基層市民，包括梁粉基層代表何喜華、施麗珊。梁振英原來先係曾蔭權路線真正繼承者，唔係唐英年。梁沿襲發展經濟、共享繁榮呢套，做大個 餅，迴避任何具所得再分配功能的社會政策。退休保障三根支柱上屆政府已硏究了四年，頂！梁振英竟然話又再硏究，擺明係唔敢得罪工商界先至再拖。
至於政制、一國兩制、中港關係，完全得啖笑，魯平、陳佐耳大談自治港獨，張曉明正面談西環治港、廿三條立法、喬曉陽談年青人國家認同，上屆林瑞麟也敢表明立法會現存功能組別不符合普及而平等原則，唯獨梁振英一句都唔敢講，講咗等如冇講！
呢份施政報告，講咗當做咗，水份多、實質小，用舊一套思維處理問題，將舊政策包裝後當新猷推出，似足地溝油。今次市民比一年前冇咁易受騙，相信佢民望好大可能再度尋底。